政情：田少攞傑出衣着獎
上海「新天地」選出大中華十大傑出衣着得獎者，得獎者中都有香港人，究竟邊啲名人着衫咁有品味，可以喺成個大中華區脫穎而出？原來香港政壇中亦有代表，就係一向官仔骨骨嘅自由黨前主席田北俊。尋日喺個頒獎禮見到田少，問佢攞獎嘅心得，佢卻直言完全唔知點解大會揀中佢。
田少尋晚以筆挺深藍色西裝襯深藍色條紋領呔出席頒獎禮，以行動證明佢對衣着配搭嘅講究。田少話有人着衫鍾情法國品牌，好似CHANEL咁，佢卻偏愛意大利牌子，事關襯到佢身形，符合最緊要舒服嘅穿衣之道。佢舉例話，自己隻腳板細，着「飛甩雞毛」嘅皮鞋就最fit，而Armani西裝就啱晒佢嘅手長。
問田少衣櫃有幾多套西裝，佢話，西裝唔係黑色、灰色就係深藍色，男人好少記得自己有幾多套西裝，恤衫同領呔就唔同嘞，佢數得出，屋企衣櫃有超過一百條呔，常戴嘅有三十條，藍色最多，黃色最少，每年亦會清咗十幾條款色過時嘅領呔，騰出空間入新貨。佢置新西裝鍾意買現成貨，事關現成貨有設計師嘅設計，佢更加唔會對套西裝修長改短，話要尊重設計者，呢啲咪叫穿衣的哲學囉！