- on.cc 東方互動主頁
- 4月10日 (四)
政府硬銷自願醫保計劃，要求私家醫院同醫生要實行套餐式收費，醫學界唔少人都反對，認為病人病情有好多變化，萬一有併發症做多咗工夫，私家醫生同醫院都擔心要倒貼，隨時蝕本。不嬲係性情中人嘅醫學會會長蔡堅，尋日出席醫療融資論壇時，就唔介意用自己新抱患癌做例子，批評套餐收費根本行唔通。蔡堅透露新抱入門一個月就發現患癌，身為老爺，佢個心不知幾痛。
蔡堅細仔今年十月十日結婚，好不幸喺婚後不足一個月、即係十一月九日，新抱就摸到條頸有粒核，去老爺診所檢查，抽組織化驗，竟然發現患甲狀腺癌。蔡堅立刻安排新抱入港島區某私家醫院、請埋一位前教授操刀切瘤，醫生原本話四至五日就出得院，點知有併發症，手術時切埋條淋巴腺，依家傷口仲滲緊淋巴液，入院至今兩個禮拜都未出得院。
蔡堅話好似新抱呢啲併發症，醫生手術之前都估唔到，套餐收費亦一定唔會包呢啲併發症嘅住院同醫療開支；如果包埋，間私家醫院隨時蝕本。為咗向政府痛陳利弊，連私人嘢都擺上枱，蔡堅真係用心良苦！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
