政情：許曉暉撐愛女勁頻撲

Florence尋日下午現身九龍城書節開幕禮，佢話一早要上電台節目，碰啱兩個囡囡參加學校運動會，所以上完電台就飛奔運動會。佢囡囡參加咗班際拔河比賽，肉緊嘅Florence不斷喺場邊打氣，囡囡不負所託，贏咗場比賽。

Florence之後又去咗馬鞍山一個家庭活動，雖然忙得不可開交，但從佢右手拳頭上面貼嘅一塊膠布，就知佢心繫家人，事關上個星期佢同囡囡整蛋糕時，唔小心辣親手，起咗個小水泡，到依家都要貼膠布。呢排Florence周圍去硬銷申亞，仲要兼顧家庭，想得閒都幾難。