最低工資成近期惹火話題，估唔到連討論查詢最低工資詳情嘅熱線電話，都可以令勞工及福利局局長張建宗同立法會議員梁國雄（長毛）擦出火花。
話說張局長尋日喺立法會研究最低工資附屬法例小組委員會上，話勞工處有個熱線電話，可以畀老闆同打工仔查詢有關最低工資嘅事情，仲係二十四小時有人接聽。長毛聽完之後即刻打個電話去睇吓，點知佢投訴條熱線無人接聽，跟住仲叫助手打去問政府熱線睇吓個電話有冇錯啦，得到嘅答案係冇呢條熱線，長毛於是乘機發難。
喺會上已重複講咗個電話號碼好幾次嘅張局長，終於忍唔住窒長毛：「（政府熱線）係1823唔係1832，唔怪得之你打唔到啦！」長毛唔死心，喺會上開埋電話個喇叭：「你自己聽吓，打咗十次都係咁，都係叫你按123（冇真人接聽），要指證你講大話！」局長今次冇佢咁好氣，長毛就叫埋在場記者打去試吓，否則斬自己個頭喎。
我哋打過呢個熱線，雖然要㩒幾個冧巴，但最後確實有人接聽回答問題，睇嚟長毛要試多幾次至得喇。