政情：怪醫提質詢瓜田李下
人稱怪醫嘅立法會醫學界代表、大腸癌醫生梁家騮，離開服務咗廿幾年嘅沙田威爾斯親王醫院，夥拍骨科醫生哥哥梁家騏開業，本周一（二十二日）起齊齊進駐中環做私家醫生，展開人生新里程。但無獨有偶，怪醫喺下星期三嘅立法會大會上有一條書面質詢，提到大腸癌可能超越肺癌，成為頭號癌症殺手，莫非怪醫想趁機為自立門戶壯聲勢？
非也，怪醫係希望搞清楚依家醫管局使用治療大腸癌藥嘅統計數字。怪醫喺質詢中提及到，依家醫管局用開嘅治療大腸癌吊針藥，病人完成一個療程，前後要留院五百七十幾個鐘，對醫療體系造成負擔。不過另外一種就係新嘅口服化療藥，可以畀病人喺屋企自己服藥，令佢哋嘅生活更有彈性。所以怪醫要求當局做吓統計，到底用舊藥要令病人同醫療系統花幾多時間及成本，用嚟研究轉用新藥嘅可行性喎，相信質詢同個人執業無關係。不過始終瓜田李下，怪醫提出質詢前，都係申報咗利益穩陣啲！