政情：劉玉蓮印度Look撐老公
印度充滿神秘色彩，難怪奧海城今年都首次以印度作為聖誕主題，利用特別嘅鏡面設計、鏡粒及LED燈，倣效世界七大奇景之一嘅泰姬陵，建造一個闊五十三呎、高廿五呎嘅泰姬陵，並舉行連串富印度色彩嘅慶祝活動，包括印度時裝騷，早前佢哋舉行亮燈儀式，身為信和集團商場推廣總經理嘅蘇蔡潔蓮特登以一身印度服飾出現，信和集團總經理余漢坤就帶埋太太劉玉蓮同囝囝一齊嚟玩，余太仲以佢自己設計嘅絲巾配襯身上嘅印度裝，相當有特色。
本身係設計師嘅余太，畢業於著名設計學府Central Saint Martins College，佢身上嘅印度絲巾就係佢畢業嘅功課，當年仲畀壞孩子John Galliano睇中，買咗佢個設計，可惜嗰時只係學生妹嘅佢，無買番條嚟珍藏。
可以回味嘅又豈止設計咁少，印度嘅點滴佢都好難忘。話說當年喺英國讀書嘅余太同姐姐，趁放假同兩個朋友去印度旅行，點知第一晚到埗就畀人載咗去山旮旯唔知邊度，好彩最後平安無事，仲玩咗成個月添。雖然旅程有啲驚險，但佢話好回味，等囝囝長大後，佢會鼓勵囝囝去旅行見識。