中環出更：麥列菲菲等湊孫享天倫
上周三突然宣布辭去英基學校協會管理局主席嘅麥列菲菲，雖然明年三月至正式走人，但佢嘅心境明顯輕鬆好多。本周一下午三點，卓妮見佢好悠閒咁喺中環一帶閒逛，一時睇碟一時行家具店，最後買咗本百幾蚊嘅月曆記事簿。麥列菲菲笑言，退休冇嘢搞，依家好期待囝囝帶埋寶貝孫仔回港度歲，享天倫之樂。
麥列菲菲當日着住成套西裝褲，頸上披掛條絲巾，手挽公事包，成個高級行政人員打扮。佢先喺中建大廈間影碟店HMV睇嘢，點知只係停留一、兩分鐘就離開，之後沿置地廣場行到太子大廈，全程面容嚴肅，好似好多嘢諗。
卓妮上前同佢打招呼，佢都好好傾，話朝早啱啱做完嘢，冇乜地方去，所以行街輕鬆吓。聖誕節就到，卓妮問佢有冇打算出埠玩，佢話咩地方都唔去，何解？原來個仔會帶埋孫仔回港度歲，所以佢一於留番喺香港湊孫，等佢哋可以陪吓自己食飯行街街，一家享天倫樂。
半退休照買記事簿
上星期三麥列菲菲宣布辭職時，已經話要抽多啲時間陪吓屋企人，包括佢期待已久嘅第一個寶貝孫，睇嚟佢真係幾渴望弄孫為樂。佢仲同卓妮講，依家退休無嘢搞，平時無乜嘢做，所以得閒就行吓街。講完之後，佢又去咗太子大廈三樓間書店逗留約十分鐘，期間向店員查詢月曆記事簿貨品，最後以百幾元買咗本就離開。之後仲再去家具店行咗個圈，但空手而回。
其實麥列菲菲仲係醫務委員會主席，上周四醫管局慶祝廿歲生日，佢都有現身同樂。醫委會負責監管全港醫生嘅專業操守，所以麥列菲菲都未算退晒休冇嘢做。如果唔係，佢又使乜咁緊張，晨早買定新一年嘅月曆記事簿呢？
卓妮