中環出更：李大壯「重拾舊歡」
全國政協委員李大壯（David）自從出任香港台灣商貿合作委員會主席之後，同台灣政商界嘅來往有增無減。早前光華新聞文化中心舉行「台灣月」開幕式，邀請台灣知名嘅南方二重唱同結他雙重奏來港表演，David百忙中都抽空捧場，仲自爆最近重拾彈奏結他嘅樂趣添！
David同卓妮講，佢十二歲開始彈結他，但未正式拜師學藝。佢試過同朋友合作喺學校表演，但老師叫佢哋以後唔好再夾，事關佢哋各自彈唱，冇乜默契喎，所以過咗冇耐David就掉低咗結他嘞。
去年囝囝突然問佢識唔識彈結他，David好威咁答：「識！」於是即刻去通利琴行買咗把幾百蚊結他彈弄一番，令佢重拾年少輕狂嘅歲月。不過幾十年冇掂過，David自嘲手指唔係咁靈活，要再練吓至得。
期待「台灣月」壓軸戲
今年「台灣月」節目內容好豐富，壓軸好戲係下月中嘅兩場民歌之夜，屆時六位台灣著名民歌手將重溫紅極一時嘅民歌，David都話好期待。