政情：張國柱旅行睇書尋慧根
正所謂讀萬卷書不如行萬里路，立法會議員張國柱同馮檢基（KK）都異口同聲話，因為平時好忙，所以無乜時間睇書輕鬆吓兼吸收新知識。其中張國柱通常趁住旅行嗰陣，先至有閒情逸致睇書，仲話自己通常睇一啲比較沉悶嘅分析性書籍。如果本書好睇，仲會重複睇添，其中有關佛教禪宗的《六祖慧能》就係佢至愛嘅書之一。
張國柱前日出席一個長者家慈善基金頒獎禮時，講到睇書係佢嘅興趣之一，好可惜平時工作太忙，根本無時間睇書，只好喺旅行嗰陣睇，一來嗰時先有時間，二來可以更加relax，盡情享受讀書樂。佢話最鍾意睇分析性嘅書，如對社會政策嘅分析、對世界性嘅影響。佢睇嘅書咁沉重，難怪平時要睇都唔容易。
KK自爆沉迷fb？
同場嘅馮檢基同樣都話，因為太忙，依家比較少睇書，但閒時都會上吓facebook，從互聯網上進行另一番探索。咁咪即係時下青少年咁，沉迷上網，連書都唔睇？