政情：莎姐愛湊孫唔玩直選

自由黨呢兩年可謂多事之秋，田二少一走，餘震猶在，田少、莎姐雙雙回朝壓陣。莎姐見慣風浪，談笑用兵，尋日同老公帶住小孫女Clio，出席鑽石山荷里活廣場一個活動後，以自由黨元老姿態接受傳媒訪問，穩定軍心。佢強調，自由黨直選之路決心不變，唔同意田二少指自由黨偏重商界嘅說法，指過去幾個月，自由黨畀人感覺路線「模糊咗啲」，佢同田少復出，就係度橋重建黨內機制，拉近地區黨員同立法會黨團嘅共識，令直選同功能界別「兩條腿」唔好愈走愈遠。

莎姐復出，重操黨務，接替田二少帶領一般事務關注組後，下一步會唔會接手埋田二少出走而留下嘅新界西帥印？莎姐封口唔回應，指現時談論選舉安排，一切言之尚早，更加唔評論會唔會喺新界西同田二少短兵相接。莎姐答得小心，但據悉，莎姐其實已篤定全面退出直選戰場，尋日無講死，只係為田少必要時或考慮出戰新界東留番一啲轉圜空間。

免分薄田二少票源

有分析指，二○一二年新界西勢加兩席至十席，以自由黨嘅票源，取一席有機，兩席無望，若莎姐出征，同田二少只會累鬥累，再者，田二少退黨後同自由黨仍分屬友好，又係田少胞弟，莎姐點會「相煎何太急」呢？所以，尋日我哋問周生，莎姐會唔會再戰江湖，佢老哥都信心滿滿咁話：「佢唔會㗎嘞。」莎姐出名聽老公話，加上尋日見莎姐同Clio全程糖黐豆，好享受做全職外婆，令周生嘅說話比自由黨發言人更具權威性！

自由黨為田二少新西收兵，不過，田二少尋日喺大氣電波反而踩多自由黨一腳，指一個政黨若太偏重商界利益，好難直選，又話如果佢一旦直選突圍，可起示範作用，商界會群起組黨參政，又話希望自己成為講道理嘅商界代表。佢唔知暗示緊邊位商界人士唔講道理，總之田二少繼續唯我獨尊，退黨之後更加係鍾意講乜都得嘞。