中環出更：鄧鉅明宴賀金刀梁受勳

上周四（十一日）晚上近八點鐘，卓妮見鄧鉅明夫婦、太子珠寶鐘錶執董朱繼陶夫婦、市場部經理蘇嘉寶、媽打李麗娟（Shelley）及名媛林李婉冰等人，由皇后大道中操落砵甸乍街四號「軟庫飯堂」，鄧太仲手持一個意大利時裝品牌DOLCE & GABBANA大紙袋，佢話係送畀金刀梁嘅禮物，內裏包括一條男裝領呔。當晚金刀梁一早就抵達飯堂迎賓，但對住卓妮就唔認有人請食飯賀佢。

媽打助母校「賣櫈」籌款

卓妮尋日又喺畢打街遇到金刀梁，問佢點解唔戴鄧鉅明夫婦送贈嘅D&G領呔，佢就笑笑口話：「佢哋真係好客氣，條呔好靚，好啱我心水，但靚嘢唔捨得戴出街嘛！」DOLCE & GABBANA設計時尚，卓妮都好期待金刀梁戴咗會變成點，不過，金刀梁話唔捨得用，睇怕只有梁太先至有幸睇到佢個新Look。

李麗娟（中）同鄧鉅明（右）一行人到砵甸乍街「軟庫飯堂」開飯。 （陳嘉順攝）

梁智鴻攞大紫荊，一眾好友齊慶賀。後排左起：朱繼陶、梁智鴻、鄧鉅明、蘇嘉寶；前排左起：鄧鉅明太太、林李婉冰、梁智鴻太太、李麗娟及朱繼陶太太。 （鄧鉅明提供圖片）

當晚同Shelley傾開，佢透露現正協助母校瑪利諾修院學校籌款，計劃讓校友認購學校嘅木長櫈，每張五萬元，捐款人可在櫈上刻上紀念字句，佢已率先聯同幾個姊妹認購咗一張，善款將用作聘請更多優質老師，令一眾師妹受惠。身為港大舊生嘅Shelley又話，嚟緊又要幫手聯絡港大舊生，參加下月舉行嘅晚宴，所以嚟緊都幾忙吓。