政情：政府大細超葉劉燒枱炮
如果講任人唯親，特區政府最親就係經濟動力。由總商會立法會代表林健鋒牽頭嘅經濟動力一直都係政府嘅「真朋友」，幾乎凡有政府錯漏，經濟動力都義不容辭出動幫手講好說話。不過，曾經係政府高官嘅匯賢智庫議員葉劉淑儀就對佢哋好唔滿意，尋日喺立法會工商事務委員會上，仲拍枱質問香港究竟係咪由經濟動力同政府共治，當立法會冇到，又話自己唔係針對政府官員，擺明係要同經濟動力對着幹。
劉吳惠蘭無言以對
話說因應金融海嘯而推出嘅中小企特別信貸保證計劃今年底屆滿，為咗延續對中小企嘅幫助，商務及經濟發展局局長劉吳惠蘭（Rita）尋日喺工商事務委員會宣布，決定由金融管理局屬下嘅按揭證券公司揸旗，推出新嘅中小企融資擔保計劃幫中小企借貸，有關詳情，財爺曾俊華同經濟動力成員、按揭證券公司董事梁君彥（Andrew）前日已經宣布晒。Jeffrey以及Andrew尋日喺會議上，對Rita多謝前多謝後，仲大讚新計劃推出時間啱啱好，兩者中間無斷層，一定會支持到底，Rita亦當然識做，多謝經濟動力一直提供意見。
可能就係見佢哋禮尚往來，一直都質疑按揭公司運作成效嘅葉劉即刻火起，炮轟當局唔跟程序做嘢，無先諮詢財經事務委員會意見就推出新計劃，質疑依家係經濟動力同政府一齊「共治」香港。Rita見勢色唔對，口窒窒想解釋，不過就令葉劉激氣多幾分：「依家係咪林健鋒同梁君彥做埋財政司司長？係咪佢哋講咗就算？」激動到拍晒枱。Rita無法插口，最後仲差啲演變成葉劉同Andrew罵戰，要委員會主席黃定光調停，事件至稍為平息。
葉劉尋日較早前去將軍澳主持新社區中心開幕，仲係笑臉迎人，仲自爆自己租咗「發水舖」，因為明明實用面積得四百呎嘅商場舖位，建築面積竟然達九百幾呎，連葉劉自己都嘖嘖稱奇。尋日「匯賢義工」、香港警務督察協會主席廖潔明都有去撐場，佢話積極考慮下年年中退休後參選區議會，仲話知道有幾個退休公務員都諗住出選添！至於依家有三個社區中心嘅匯賢智庫仲會唔會擴大版圖，葉劉就話要有適合人才做管理先得喎！