王小姐早前發現香港迪士尼樂園門口近巴士站一帶蚊患嚴重，不少遊客及職員停留片刻，已經被蚊隻叮咬至體無完膚，要求樂園增加滅蚊次數，免令旅客留下滿身蚊瘌，「啲蚊再咁多落去，真係會影響樂園嘅訪客人數！」
大嶼山居民協會主席郭平指出，迪士尼樂園深受旅客歡迎，又獲政府強力支持，應盡快增加滅蚊措施，保障樂園聲譽，「如果啲旅客排排吓隊，之後發現成隻腳又痕又腫，會無癮之餘，仲覺得嗰度管理好有問題！」
香港迪士尼樂園度假區傳媒關係發言人表示，樂園有定期清除雜草、清理積水及時刻保持環境清潔衞生等，以杜絕蚊蟲孳生，亦會定期監控蚊蟲生長情況及進行滅蚊工作。
食物環境衞生署發言人則稱，曾派員與樂園職員巡查，雖未發現蚊蟲孳生，惟已提醒樂園負責人加強防蚊措施。