中環出更：霍家總動員主持奧運廣場開幕
由霍英東基金會及南沙區政府共同興建嘅南沙灣畔「奧運廣場」尋日正式開幕，身兼港協暨奧委會會長嘅霍英東集團主席霍震霆（Tim霍），聯同胞弟霍震寰及霍震宇等霍氏家族成員，一齊遠赴南沙主持揭幕禮。Tim霍三兄弟見證廣場開幕時相當感動，皆因廣場標誌着海濱新城建設邁進全面收成階段，意味其父親霍英東建設南沙嘅遺願可以得到圓滿落實。
正當廣州舉辦亞運會之際，霍家尋日為南沙奧運廣場揭幕舉行一連串活動，早上先為博物館霍英東銅像揭幕，繼而為奧運廣場揭幕，然後再進行植樹活動及參觀南沙遊艇會。幾項活動均經過悉心安排及分工，作為重點活動嘅奧運廣場揭幕就由Tim霍三兄弟陪同國際奧委會主席羅格及中國奧委會主席劉鵬主持，而參觀南沙遊艇會就主力由霍啟山領軍。
啟山身負重任，全程招呼羅格夫婦，沿途講解霍家喺南沙嘅發展，特別係佢主理嘅南沙遊艇會，講得有板有眼。至於大哥啟剛就負責「打游擊」，招呼唔同賓客，期間有向劉鵬講解霍家嘅南沙發展。兩兄弟嘅分工，意味逐步接棒Tim霍嘅體育事業及家族業務。不過，Tim霍笑笑口同卓妮講：「今次活動好難得，等啲後生仔幫吓手、學吓嘢啫！」
Tim霍話，尋日一連串活動令佢好感觸，好開心霍家上下聚首一堂，最難得係媽咪坐咁遠車都出席揭幕禮，而霍震寰就感謝各位嘉賓畀面出席。卓妮尋日仲見到啱啱搞掂官司嘅Tim霍孺仔啟人，着得西裝骨骨出席。問佢會否學兩個哥哥咁參與體育事業，啟人坦言呢方面遲少少至諗，目前希望盡快完成學業回港發展，又話自己對政治方面無興趣，希望主力打理家族生意。
郭炳湘夫婦恩愛撐場
霍家尋日仲邀請咗對神秘嘉賓，就係新鴻基地產非執董郭炳湘與太太Wendy，兩人表現恩愛，Wendy仲好落力幫老公影相。郭炳湘話，之前去過南沙幾次，大讚多嘢玩，好似打高爾夫球同坐遊艇出海，鄰近中山及番禺又多美食，所以耐不耐就會返去行吓。問郭炳湘嘅新工作會否輕鬆啲？佢同卓妮講：「我哋呢啲無所謂啦，有嘢做就做，無嘢做就歎吓世界囉！」
卓妮