探射燈：各界炮轟影視處
婦女權益聯盟副總幹事伍婉婷：「影視處執法根本過於寬鬆，助長不良傳媒利用不雅資訊增加銷量或點擊率，好似『如何自行檢查乳房』條片，表面上係關注女性健康，但人人理解心態都唔同，如果已被評為第二類不雅物品，即使事後加回警告字句，亦冇理由唔使追究，影視處咁做完全畀其他傳媒一個唔好嘅示範，唔通殺完人清理咗現場，就可以當冇殺過人？影視處執法應該強硬啲。」
東區家長教師聯會主席趙明：「我覺得依家法例同指引唔清晰，令不良傳媒都可以響灰色地帶做嘢，不斷測試條例嘅底線，而影視處又淨係揸住天書做嘢，一向都冇乜檢控，就算檢控嘅刑罰都係好低，對不良傳媒根本冇乜阻嚇性，容易令一啲機構利用不良資訊，荼毒青少年。影視處應該雙管齊下，一方面令條例更加清晰，同埋都要加強執法，唔好成日放到咁鬆。」
香港教育政策關注社主席張民炳：「影視處唔處理（檢控）『如何自行檢查乳房』嘅短片，難免令人產生因人而異、因機構而異嘅處理方法，短片評級前發布嘅片段，已違反規定，影視處應該處理。至於報刊註冊管理，影視處更加係責無旁貸，唔可以話多人睇就管得嚴啲，少人睇嘅六合彩報就管少啲，影視處應該要公平啲處理所有嘢。」
