政情：康叔出新書 論盡政治
前人大代表吳康民尋日推出新書《闖進政治禁區》，由六四事件講起，涉獵唔少敏感議題。康叔咁耐冇同大家見面，加上做咗三十幾年人大嘅佢喺政界朋友多籮籮，大家知道佢出政治評論合集，都蜂擁而至撐場，尋日短短半個鐘嘅首讀會，中聯辦副主任黎桂康、行會召集人梁振英、政制及內地事務局局長林瑞麟、長江製衣創辦人陳瑞球同港區人大代表雷添良都有到，恒基主席李兆基同恒隆董事總經理陳南祿都送上花牌祝賀，完全反映咗康叔嘅江湖地位。
康叔話，退咗休後識咗好多新朋友，因為佢個個星期都會寫專欄論盡時弊，間唔中仲會就敏感議題同人筆戰，仲有唔少人睇完佢嘅文章後都會寫信嚟回應，一來一往以文會友，成為一種意外收穫。除咗政治評論嘅文章，康叔仲會寫吓啲溫馨嘅隨筆小品或者家庭生活瑣事，遲啲又會結集成書，誓要保持每年出兩本新書嘅目標咁話！