政情：白鴿黨唔再避風頭

民主黨夏天時多次去中聯辦討論政改，結果佢哋衡量輕重後，冒住畀其他泛民黨派柴台之險，決定支持修訂後嘅政改方案。支持方案一定要付出代價，當時該黨下定決心，短期內要謝絕一切重要任命及受勳等，以免畀人口實，話佢哋喺支持政改之後加官晉爵，此外，仲要喺其他政策上加多幾錢肉緊批評政府，用呢啲方法避一時風頭。

不過，風頭好快就避完，早前民主黨立法會議員李永達已經被委任為立法規管一手住宅物業銷售督導委員會委員，今次羅致光接受作為關愛基金督導委員會嘅成員，可以話民主黨已經全面復出。有黨內消息話，一時避風頭嘅政策就好似「八萬五」咁，唔講就唔存在架喇。