政情：鍾瑞明講置安心一肚火
樓價狂飆，人人難買樓，港府拒絕復建居屋，僅推「置安心」計劃止渴。曾經做過房屋協會主席嘅民建聯總幹事鍾瑞明尋日「大義滅親」，狠批由房協揸旗嘅「置安心」唔能夠解決現時難上車嘅問題，都係認為復建居屋最實際。
曾經做過中英土地委員會中方代表、行會成員同房協主席嘅鍾瑞明，尋日獲城大頒發榮譽社會科學博士，以表揚佢對香港嘅貢獻。有得「扑頭」固然開心，但講起佢最熟嘅房屋政策，鍾瑞明似乎有唔少怨氣。佢批評港府力推嘅「置安心」計劃供應極少，根本無助解決供求失衡嘅問題，又話市民期望咁殷切，各政黨又咁難得有一致共識，唔明點解港府唔從善如流復建居屋。佢又直言，明白港府未走出八萬五嘅陰霾，但家陣大家只係想佢推出五千個單位啫，認為復建居屋唔會衝擊市場。
鍾瑞明唔少黨友尋日見證佢「扑頭」，早前做白內障手術嘅基本法委員會委員譚惠珠，尋日睇嚟已經好番晒，黨主席譚耀宗就話希望鍾瑞明快啲請食飯慶祝喎！