中環出更：Flash ON weekly創刊 名媛潮人齊聲讚好
東方報業集團去年底推出時尚特刊－LUXE life（極尚生活）後，反應極受歡迎，今年再接再厲獻上新猷，推出女性潮流周刊《Flash ON》。Flash ON意思係靈光一閃，但引發無窮創造力，正如《Flash ON》面世為大家帶來最新嘅女性潮流資訊，尋日創刊派發已好評如潮，索閱嘅大部分以女性為主，更不乏名媛捧場客，包括恒生銀行創辦人何善衡後人何乃斌太太何倍倩（Anina）。
經過推出「LUXE life」嘅經驗，本集團打造《Flash ON》更加得心應手，尋日早上分別到多個地區免費派發，由於《Flash ON》封面名模Melanie Z.嘅服飾鮮艷搶眼，加上印有小標題簡介刊物重點內容，所以吸引好多女士們索閱，而且大部分都係衣着打扮靚靚嘅OL，部分人索取後更急不及待邊行邊翻閱，認真捧場。
資訊高檔 彩圖專業
卓妮中午路經中環娛樂行期間，巧遇恒生新抱何倍倩（Anina）索閱《Flash ON》，Anina睇後大讚內容豐富，話無論時裝或扮靚方面資訊都好高檔，彩圖又影得好有專業水準，整體相當吸引。至於刊物邊部分令佢最深刻，Anina較為喜歡潮人專欄作家Winifred Lai嘅時裝及化妝品推介，佢話潮人推介潮物會更有說服力。其實好多OL同Anina嘅反應一樣，覺得《Flash ON》彩色豐富，無論廣告與內容、圖片與文字都好平衡，排版又好，建議提供不同貨品格價資訊就更加完美。
咪以為《Flash ON》淨係吸引到OL，男士們都一樣爭住睇，好似Sony Computer Entertainment市場部總經理項明生，一攞到手就大讚刊物紙質夠靚，排版活潑唔古板，顏色鮮明，可吸引年輕消費者。項明生最欣賞刊物嘅專欄豐富，特別係作家韓火火，但佢建議增加旅遊欄目將會更加吸引。東華三院前主席李三元都認為《Flash ON》內容時尚，版面搶眼有朝氣，睇到人好開心，適合女性參閱，佢話會攞份返屋企同太太分享，update吓時尚資訊。
卓妮