政情:超級區會門檻趕絕公民黨

各黨派近日齊聲炮轟港府上星期推出嘅政改本地立法建議方案「魔鬼在細節」,公民黨更直斥政府明益大黨,為自己同其他細政團喊冤。其實公民黨真係有苦自己知,因為政改嘅本地立法建議,要參選區議會超級議席要得到十五個民選區議員提名,但公民黨內只得十個區議員,點都砌唔夠十五張提名票,喺泛民中又因為早前嘅政改方案留低唔少過節,唔會有人拔刀相助將提名過檔,於是十五呢個數一出,公民黨即刻走入絕路。

實際上,公民黨又點值得同情吖?早前喺政改五部曲,佢哋企到最前,黨內立法會議員堅決辭職再參選,同最激嘅社民連拍住要搞所謂「公投」。佢哋反對協商,就修訂後嘅政改方案投反對票。方案通過咗,佢哋竟然又要循佢哋反對嘅方案參選,自打嘴巴莫過於此。

數晒手指都砌唔夠十五人,佢哋好自然就係諗到借助外援,於是早前就傳出公民黨向民主黨內嘅一班反叛分子即係新民主同盟打主意,希望可以吸埋佢哋嗰九個區議員成員,以為十加九一共有十九票,可以穩奪超級區會議席入場券。不過呢個「合併」最後冇出現,雙方仲矢口否認有傾過埋班。其實新民主同盟一直開宗明義唔退黨,無非係要留喺黨內搞事,公民黨如果以為可以冷手執個熱煎堆撬走九票,想法未免太簡單。

民主黨自給自足最有利

相比起公民黨立即要丟掉參選區議會超級議席嘅幻想,民主黨就風流快活得多。雖然依家不時都畀人質疑政改方案同政府早前答應嘅貨不對辦,民主黨主席何俊仁仲話愈諗個心就愈唔舒服,特別要講清楚其實冇畀政府呃,但有民主黨中人就指出,依家嘅方案對白鴿黨選區會超級議席絕對有利,因為泛民中只有民主黨可以喺財政同提名上都「自給自足」,攞到入場券,講嘢都大聲啲。所以凡事有權利亦有義務,民主黨願意投票支持修訂咗嘅政改方案,之後條路好行好多,都只不過係講明凡事有因有果啫。

Money18新功能「18好路數」為你預測心水股票升跌機會率