中環出更：施榮忻要湊夠兩個「好」
名人圈旺生龍B，剛卸任百仁基金主席嘅施榮忻（Jaime），早前喜獲麟兒施湧濤（Torres），日前喺「五稜會」擺99日宴，取其長長久久嘅好意頭。Jaime大爆太太Jaymee起初懷孖胎，點知其中一個喺懷孕個多月不幸流產，幸而Torres生命力強，成功出世。兒子得來不易，一家人都分外感恩。
乖仔百日，Jaime十足自己結婚咁開心，話晒係菁英會創會主席，城中富二代兄弟雲集，常務副主席梁宏正帶埋太太張曉君出席，廠商會展覽服務有限公司主席吳永嘉就有太太Esther相伴。
乖仔百日大 high爆宴客
幾杯落肚，Jaime心情high爆，呼籲賓客「咪早走」。佢致詞時又將囝囝的99日宴講成係99歲生日，兄弟都笑佢飲醉嘞。Jaime承諾三年後再生，佢原本有兩個乖女，一於湊夠四子女。
家有喜事，身為二佬嘅廠商會會長施榮懷（Irons）滿場飛敬酒，酒量深不見底。佢上任會長後，將商會搞得有聲有色，抵佢開心。嚟緊八月中，Irons將帶隊訪問內蒙，九月又首次聯同工業總會一齊北上考察，一於工總、廠商一家親。每年工展會係廠商會重頭戲，雖然仲有四個月先開鑼，但攤位勁搶手。搞手吳永嘉話，八百幾個攤檔已全部租出，參展費上調百分之十，仍然爭崩頭，但佢哋不忘回饋社會，今年將加碼拎出五百萬元，資助低收入家庭去工展會任買，果然係良心企業。
卓妮