政情：陳新滋聞劉曉波左閃右避
浸會大學第四屆普立茲新聞獎得主工作坊尋日搞開幕禮，新任校長陳新滋主禮，最近陳校長捲入是非，被浸大學生批評對聯署要求釋放劉曉波遲遲未表態，佢尋日現身即被記者追問，但陳校長話，最近只係收過一封聯署信，就係校內學生要求減宿舍租金喎。
「唔係咁了解」
普立茲獎被喻為「新聞界的諾貝爾」，工作坊開幕禮嘉賓之一美國駐港總領事楊甦棣致辭話，香港傳媒可以連篇累牘報道劉曉波事件，好多地方都做唔到，大家要珍惜咁話。楊甦棣講普立茲獎都可以扯到劉曉波事件，同陳新滋左閃右避嘅態度簡直係相映成趣。
開幕禮結束，記者上前問陳新滋，浸大三十位教授聯署要求釋放劉曉波，點解佢唔響應？
陳校長話，聯署釋放劉曉波？從來無收過喎，浸大學生反對宿舍租金貴、要求減租嘅聯署信就收到一封！至於劉曉波事件，無論記者點樣追問，陳校長都係嗰句：「唔係咁了解。」陳校長係咪應該睇吓報紙，先至出席呢個普立茲新聞獎得主工作坊呢？