中環出更：朱玲玲「源」續美麗傳奇

受細仔霍啟人醉駕事件影響，朱玲玲呢排亦顯得憂心忡忡，日前陪囝囝上庭，連頭髮都懶得set。但講到轉季置裝，就唔懶得。

御用設計師 造衫首選

早前一個星期六晏晝五點，卓妮撞見薄施脂粉，穿着白恤衫、卡其色四個骨褲嘅朱玲玲，獨自喺置地廣場嘅「源」揀衫。店內款式花多眼亂，朱玲玲逐件新裝細心睇，對其中一條質料飄逸嘅白色絲巾非常着迷，攞上手細心研究。佢喺舖頭逗留大半個鐘，終於有收穫，拎住戰利品離開。卓妮上前問佢買咗乜？朱玲玲甜笑話：「都唔知點答你好。」真鬼馬。

小小環保袋內有乜戰利品？朱玲玲話「都唔知點答你」。

拎住戰利品離開嘅朱玲玲，睇嚟收穫甚豐。

唔使多講，熟悉朱玲玲嘅人都知，「源」已成為佢嘅御用設計師，出席大小場合，佢都首選「源」嘅出品。朱玲玲曾透露，喜歡「源」嘅設計糅合中西文化元素，質料高雅舒適，加上「源」嘅老闆好抵得諗，每當朱玲玲想訂造新衫出席公開場合，幾忙都會幫佢趕衫。朱玲玲早前去上海做十大傑出衣着獎頒獎嘉賓，佢都係着住一套由「源」出品嘅白色中式衫褲，高貴得嚟又唔會搶去得獎者嘅風頭。

朱玲玲（右）係熟客仔，店員（左）殷勤招待。

朱玲玲睇中一條白色飄逸絲巾，攞上手睇真啲。 （黃耀勤攝）

呢個秋冬，「源」到底興啲乜？原來係大玩明朝風格，以糅合明式官袍、明式家具線條魅力及明式美學觀念，演繹出簡約又優雅嘅時裝。朱玲玲嘅美貌，宜古亦宜今，唔知「源」嘅老闆，會否諗吓搵佢做代言人？