政情：劉秀成撐陳智思選特首
立法會建築、測量及都市規劃界議員劉秀成，喺尋日播出嘅電台節目講到自己加入立法會從政嘅經過，仲話覺得立法會舊同事陳智思好叻，好應該去選特首添。
原來劉教授識睇風水，已故港督尤德亦曾徵詢佢嘅意見。佢仲話，依家禮賓府其實好多係日式設計，唔明當年點解唔改番做英式喎。劉教授曾經做過港大建築系系主任，之後轉戰建築師學會做會長，期間睇到好多社會問題，令佢萌生從政嘅念頭。佢話，自己桃李滿門，能夠當選議員都可能因為咁。
劉教授亦透露，當年初入立法會乜都唔識，幸好得工程界何鍾泰指點，加上當時泛聯盟嘅朋友幫手，先可以咁快上手。佢仲特別提到，前保險界立法會議員陳智思年輕、有幹勁又夠叻，真係好應該選特首，不過對方成日話自己身體唔好，所以唔想做。其實「公職王」陳智思依家咁多公職，身體仍然咁好，唔知佢聽到劉教授咁講會唔會心動呢？