中環出更：扮嘢文帶隊拜神求平安
卓妮尋日日光日白見到中環蘭桂坊加州大廈（California Tower）企滿晒人，照計嚟clubbing又無理由着得咁中環返工feel，若然前晚蒲到尋日朝又無可能仲咁精神呀？加上喺正加州大廈嘅正門，放咗張枱、擺咗兩隻大燒豬同其他祭品，搞到卓妮都心思思去趁吓熱鬧。
企咗一陣，卓妮見到一身「源」中國服嘅蘭桂坊之父扮嘢文盛智文出現，佢一嚟到就揮手同大家打招呼，原來加州大廈要拆卸重建，尋日佢哋特登舉行拜神儀式，祈求一切順利，扮嘢文一對仔女Jonathan同Marisa原來一早喺人堆中打點。
扮嘢文喺香港住咗幾十年，一向入鄉隨俗，兩年前已經入咗中國籍。雖然今次拜神佢事前未至於要齋戒沐浴，但都特登着番套唐裝以表誠心。為求工程順利，佢仲親自督促員工拜神上香，學佢話齋，最緊要員工平安大吉，佢做咩都得。對於呢啲儀式，扮嘢文一啲都唔陌生，佢同仔女一人攞住一支貢壇長壽香誠心拜祭，之後三、四十個員工輪流上香，差唔多企滿半條街，夠晒氣勢。
發迹地重建
上完香，扮嘢文先同仔女切右邊嘅燒豬，再同工程師切左邊嗰隻，之後仲同大家一齊食燒豬，樣樣做到足。咁又係，加州大廈話晒都係扮嘢文嘅發迹樓，點馬虎得！
拜完神，扮嘢文就同幾個工程師入拆卸緊嘅地盤參觀，臨走不忘叮嚀管工，最緊要安全，睇嚟佢對神對人都一樣咁重視。扮嘢文話今次個工程要搞兩年半，將加州同孖住嘅加樂兩幢大廈二合一。不過蘭桂坊係中環地標，咁搞法，容乜易影響生意？扮嘢文就信心十足話唔怕，嚟緊係萬聖節旺季，佢哋到時會喺圍板加啲節日特色嘢，附近嘅餐廳酒吧一樣會好似往年咁裝飾，再唔係大家可以入海洋公園「撞鬼」，一樣咁好玩。手板手背都照顧到，扮嘢文果然有計！
卓妮