政情：長谷川祐子打西九筍工？
西九文化區管理局尋日公布最新年報，雖然計劃仲喺設計階段，但文化區人手編制急增。近日傳出消息，做過兩年西九管理局董事局成員嘅日籍博物館專家長谷川祐子，今年冇續任做董事，可能係有意申請出任西九M+博物館第二把交椅。據聞呢個年薪逾百萬港元嘅筍工，專管M+博物館營運，啱晒佢專長，難怪佢有董事唔做，寧願紆尊降貴做打工仔。
西九管理局消息話，長谷川祐子係日本博物館專家，喺○八年被港府委為做西九管理局董事，為香港提供專業意見，過去兩年，佢每次開會都要由日本專程飛過來，但出席率好高，工作十分投入。
上星期港府委任新董事時，長谷川祐子榜上無名，唔少董事局成員好詫異，但一切同佢個人決定可能有關。
局中人話，長谷川祐子一係嫌每次開會要由日本專程飛香港，太辛苦唔玩；一係有意做M+博物館嘅第二把交椅，落手落腳搞博物館。若屬實，長谷川祐子好可能成為M+博物館候任行政總監李立偉嘅副手，即係話，香港嘅M+博物館兩個掌舵人都係外籍人士，夠晒國際視野，當然人工亦要具吸引力。