政情：盛智文反串扮孟婆
海洋公園主席盛智文又出動。有「扮嘢文」之稱嘅佢尋日出席下月海洋公園萬聖節派對宣傳活動，再次發揮佢超卓嘅扮嘢天賦，身為外國人嘅佢反串扮演中國靈界人物「孟婆」。可能佢嘅扮相太逼真，搞到在場記者經過佢身邊兼同佢影相留念時，都認唔出係佢。
扮嘢文以前扮過殭屍、紙紮公仔、鬼新郎同中國皇帝等角色，為迎接下個月哈囉喂活動，尋日花咗三個鐘頭接受3D易容特技化妝兼裝扮，以孟婆造型現身。一班傳媒尋日應邀去海洋公園採訪，期間被安排經過「奈河橋」飲「孟婆湯」，同孟婆合照，但全人類都唔知道派孟婆湯嘅竟然就係扮嘢文，到後來佢一手揸住拐杖、一手拎住碗湯，仲寒住背咁現身宣傳活動時，大家先至恍然大悟。
易容花三個鐘
扮嘢扮到上癮嘅盛智文話，身為主席，每年萬聖節都要諗吓可以做啲咩，真係好大壓力；不過今次孟婆造型十分成功，即使化妝換衫用咗三個鐘，佢話都係值得喎。見佢尋日落力推薦傳媒飲孟婆湯，話飲咗會唔記得晒生前所有記憶，可以重新投胎做人，真係要寫個「服」字畀佢。