中環耳目：獨門蘿蔔絲酥餅張秉煌激讚
以精緻中菜西食聞名嘅聘珍樓，近年愈嚟愈受城中老饕歡迎。早前卓妮喺佢哋中環盈置大廈嘅分店飲茶，見到聘珍樓高級副總裁張秉煌（Billy）喺度試菜。原來佢約咗好友金谷科技總裁秦善文（Sam）先試為快，點知阿Sam臨時有急事出咗埠，唔知係咪海外富豪拍檔有急Call呢？
Billy今次特登嚟試蘿蔔絲酥餅，事關最近佢挖角請咗一位名廚過檔，佢嘅拿手好菜就係蘿蔔絲酥餅。Billy話，無論呢位名廚喺邊度做嘢，嗰間食肆就一定有蘿蔔絲酥餅坐鎮。當日佢試過之後讚不絕口，尤其是清甜多汁嘅蘿蔔伴以至靚嘅金華火腿，餡肉入口即化，再加埋名廚獨門炮製嘅酥皮，香脆美味冇得頂。Billy又試埋舞茸燉鷓鴣湯，極力推介係秋風送爽時滋陰潤肺之選。
唔講唔知，聘珍樓係有百年歷史嘅日本食肆，老細仲係日籍華人。佢哋廿二年前正式打入香港，Billy係開國功臣。金鐘統一中心嘅名都大酒樓，都係佢哋旗下嘅食肆。