中環出更：梁君彥專掃減價領呔
經濟動力立法會議員梁君彥（Andrew）係製衣廠老細，對於衣着品味實有自己一套。早前卓妮喺電子業商會酒會上，見Andrew戴咗條粉橙色、上面滿布小星星圖案嘅Celine靚呔，於是問吓佢平時揀領呔有咩要求，Andrew好謙咁話：「趁減價時買㗎，幾百蚊一條啫！」佢又話名牌領呔郁親千幾蚊一條，佢覺得好肉赤，所以通常趁大減價時入貨喎！
Andrew對領呔顏色同圖案有高要求，顏色至緊要柔和，佢屋企有好多粉紅色、黃色同淺藍色領呔；當日戴住嗰條Celine粉橙色靚呔都夠晒特別，閃閃星星嘅圖案好有童趣。由於要求多多，Andrew鍾意自己買領呔，牌子唔拘，但唔會假手於人，太太都唔例外。
不過，Andrew呻今時今日名牌領呔實在太貴，佢做製衣呢行，一件衫先至賣幾百蚊，賺錢好辛苦，但一條名牌靚呔要價千幾蚊，所以多數大減價至出動掃貨，做廠出身嘅佢，數口果然好精，學佢話齋，搵食艱難嘛！