政情：中總敲定楊釗接班

中總早前選出新一屆常董，四十九名常董本周五選出新一屆會長同八位副會長。中總崇尚和諧，選舉未投票，新領導層嘅人事布局已經協商敲定。按會規，最資深嘅兩名副會長將會卸任，騰出位置畀新人填補，據悉，張成雄同林銘森將會卸任，由莊學山同林樹哲接替出任副會長，而會長則由蔡冠深冧莊。

消息透露，論資排輩，應該到楊釗揸旗，但中總經過一番內部醞釀，敲定蔡冠深冧莊做多一屆，兩年後即二○一二年同IQ博士一齊退，屆時才交棒畀楊釗。楊釗有「牛仔褲大王」稱號，曾以港進聯身份當上臨時立法會議員，九八年循選舉委員會界別競逐連任失敗，現時為民建聯監委會副主席，皈依佛教、篤信因果嘅佢近年轉趨低調，估唔到佢兩年後接掌中總，睇嚟佢再難過平靜生活。

功能組別存廢成新戰場

香港已有普選時間表，功能組別存廢勢必成為下一個政改戰場，正如全國政協常委陳永棋所言，商界要認真思考如何迎接呢股新挑戰。作為親中龍頭商會之一嘅中總，未來必有新景象，楊釗接掌中總，政治功能有增無減，好考功力。至於一二年接替IQ博士嘅中總立法會代表，更加身肩重任。

消息指，中總將在四十九名常董中揀選立法會代表。與以前不同，今次選賢除衡量中總內嘅名望外，仲要求新人年輕化、在業內有一定江湖地位，上任後仲要能瞓身議會工作，改善功能界別形象。早前傳出廖長江係黑馬，但消息透露，廖長江回話，出任議員無問題，但要佢完全放低大律師生意有難度，所以無法跨過中總嘅新「門檻」。據聞，港區全國政協委員黃英豪行情較看漲，一來佢較其他常董涉足政壇較早，二來佢嘅政治人脈同手腕較成熟。一二年後，中總若然改由兩位半政半商人士分別坐會長同立法會代表之位，到底意味咗乜嘢呢？