中環出更：稀客Tim霍現身建制派飯局
立法會正式復會，立法會建制派飯局又開飯嘞！卓妮尋晚七點去中環干諾道中嘅中華總商會飯堂湊熱鬧，見各黨都有代表出席，最難得嘅係，尋晚多咗位「稀客」，就係文化、體育及出版界代表「Tim霍」霍震霆嘞，原來佢係嚟為香港申辦亞運會拉票。
為申亞拉票
尋晚飯局共有二十六位建制派議員捧場，席間大家交流對施政報告意見，又敲定立法會各委員會正、副主席協商名單。不過，呢啲都係例行公事，反而最後一個「議程」，輪到Tim霍起身發言為香港申亞拉票，最令大家精神一振。
有建制派議員話，印象中從未見過身兼港協暨奧委會會長嘅Tim霍出席飯局，Tim霍發表飯局「講話」更加千載難逢。Tim霍一起身就開宗明義，希望大家支持申亞，點名叫民建聯同自由黨唔好咁早企硬反對。Tim霍豁出去，在座議員亦不顧「議事規則」，一齊起哄，七嘴八舌，有議員叫出嚟，指Tim霍無為拉票做足政治聯繫工作：「識你咁耐，淨係請我睇過兩場波！」睇嚟Tim霍拉票仍需努力嘞。