中環出更：蔡冠深為郎朗豪購三角琴
被美國《時代雜誌》選為全球百位最具影響力人士之一嘅國際知名鋼琴家郎朗，前日到訪香港，吸引逾百位名人同佢食晚飯，尋日仲喺演奏會上顯身手。郎朗對音樂嗰份執着係人都知，估唔到佢揀鋼琴同樣好有原則，只彈頂級鋼琴Steinway & Sons（史坦威），呢個品牌係鋼琴中嘅勞斯萊斯。福布斯富豪、中總會長蔡冠深同卓妮講，佢曾經為郎朗租台史坦威三角琴返屋企，後來仲索性買咗台擺喺屋企。
每台逾百萬元
郎朗來港就趕去港島香格里拉酒店，出席由萬寶龍贊助嘅「與中國之子——郎朗相聚」慈善晚宴，為香港管弦樂團籌款，蔡冠深太太蔡關穎琴以香港管弦樂團籌委會副主席身份與老公齊到場。
蔡冠深自爆係郎朗迷，仲請過對方去佢屋企露兩手，當時請埋六十位跨國公司嘅CEO齊欣賞。近距離聽郎朗演奏，蔡會長話感覺好震撼。不過安排郎朗去蔡家表演，原來花唔少心血，皆因郎朗指定要彈史坦威三角琴，蔡家本來有台三角琴，但唔係呢個牌子，惟有急急租台史坦威三角琴。表演完畢，蔡會長索性買台史坦威三角琴擺喺屋企，等下次郎朗再去佢屋企獻技時，唔使租琴咁麻煩。史坦威三角琴唔平，據聞每台售價至少逾百萬港元。