政情：IQ博士娶新抱中西合璧

立法會議員黃宜弘（IQ博士）與太太梁鳳儀尋日真係飲得杯落！佢哋做醫生嘅三仔群恩終於成家立室，迎娶音樂博士吳啟華，尋日仲喺尖沙咀洲際酒店舉行酒會及筵開六十席，盡顯氣派。

到訪賓客亦係重量級政商界名人，尤以商界為主，包括搵梁鳳儀寫自傳嘅恒地主席李兆基、長實集團副主席李澤鉅、英皇集團主席楊受成、牛仔褲大王楊釗夫婦、玩具大王蔡志明夫婦、中策集團主席馬時亨及行政總裁柯清輝夫婦、福建幫頭領楊孫西及盧文端等，連平時甚少夫妻檔出現嘅立法會議員劉江華夫婦都有現身。

傍晚六點酒會開始前，IQ博士夫婦與一對新人及親家共二十幾人，齊集酒店樓梯影大合照，兩家人嘅服飾經過悉心安排，男士清一色着西式禮服同打煲呔，女士就着中式裙褂。為凸顯一對新人與眾不同，新郎棄煲呔改戴領巾，新娘就依舊穿着傳統紅色裙褂，唔同係其他女士着金黃色裙褂，透過男女服飾演繹中西合璧。

由於女家係台灣人，IQ博士話，今次婚禮表現出香港同台灣一家親。拍過照後，IQ博士頻頻走上走落迎接貴賓，但佢樂此不疲，仲話七十一歲人，咪當做運動喎！今次婚禮中，IQ博士搵咗盧文端女兒幫手做花女，着起套花裙都幾靚女㗎！

雖然傳媒未能進入婚宴會場採訪，但IQ博士都與大家分享喜悅，送上兩張餅卡，一張係美心西餅券，另一張係臘腸券，親家嫁女就話請食餅啫，但送臘腸又代表乜呢？莫非係成雙成對？