中環出更：女童軍鬧風波 孫太行街High Tea減壓
香港女童軍總會近期鬧出總監超齡風波，搞到身兼副會長嘅教育局局長孫明揚太太鍾小芬都話壓力大而噩夢連連，要睇中醫調理身體。不過，身經百戰嘅孫太都懂得放鬆自己，閒時約埋一班闊太去行街Shopping同歎茶，前日下午仲見佢喺ifc商場閒逛，買完麵包睇時裝，輕鬆寫意，最後登上AM4政府座駕，去接埋孫公放工一齊返屋企食飯。
孫太前日着咗件長身恤衫襯三個骨深色褲，悠閒自在行街街，見佢上咗ifc一樓間simplylife Bread and Wine買幾盒麵包，之後就喺商場閒逛，無耐入咗Zara睇衫，但兜咗幾個圈無收穫就離開。卓妮上前同孫太打招呼，佢心情好靚，大讚simplylife啲麵包款式夠新潮又特別，孫家上下都好鍾意食，所以經常去幫襯喎。
「女人Shopping最開心」
孫太話，近期得閒都會約朋友行街飲茶輕鬆吓。佢笑笑口話：「我哋啲女人最開心就係去Shopping㗎啦！」卓妮早前確實遇到孫太約埋班闊太好友去Shopping，大家挽住一袋二袋，興高采烈去置地廣場Landmark Cafe歎下午茶。不過，孫太話成日喺香港都覺得有啲悶，所以每逢孫公離境公幹，佢都會做跟得夫人出去行吓，順便
實孫公嘅飲食，皆因孫公血壓高，飲食要節制喎！
講番孫太前日幫襯嘅simplylife，為美心集團旗下品牌，麵包質素好高，好似Almond Croissant（杏仁牛角包）、Strawberry Danish（士多啤梨丹麥酥）及各式三文治等，品嘗新鮮麵包嘅同時，仲可以歎杯咖啡，唔啱仲可以飲杯有機紅酒，欣賞埋落地玻璃嘅無敵海景，確係悠閒享受。
卓妮