政情：港高官照赴日開會
中國同日本因釣魚島事件關係繃緊，港日交往會唔會受影響？特區高官以行動顯示，一切如常。新聞處尋日出新聞稿，話發展局局長林鄭月娥今日將率團赴日，一連兩日出席喺東京舉行嘅第八屆亞太區基建發展部長級論壇。
大約十五個國家同地區嘅部長將出席論壇，林鄭會發表演說，介紹香港嘅全面水資源管理策略同防洪策略，喺東京期間，仲會到訪日本國家基金，了解文物保育工作。林鄭咁畀面，原來論壇明年底輪到喺香港舉行，港府梗係想日本明年可以禮尚往來啦！
講開又講，商務及經濟發展局副局長蘇錦樑（Greg）上星期亦去咗日本四日，代表政府出席亞太經合組織（APEC）部長級會議，喺多個場合發言，坐佢隔籬嘅正係代表中國嘅副部級官員、工業和訊息化部總工程師朱宏任。Greg蘇話，佢哋交流兩地對中小企支援心得，仲話傾得好投契。