政情：WK狂插強積金唔掂
曾經係人民公僕、九十年代做過副教育統籌司嘅林煥光（WK），當年曾力推老年退休金但無功而還，依家做咗平等機會委員會主席，就掉轉槍頭狂插推行緊嘅強積金唔掂。佢批評政府過去五年都冇提過退休保障四隻字，又話政府儲埋咁多錢，「與其畀人買電燈膽、派畀啲唔需要你支持嘅業主免佢差餉」，不如由政府帶頭畀大筆墊底基金，去推行全民退休金仲好喇。
WK喺爭取全民退休保障聯席嘅宣傳片裏面，大講強積金唔掂嘅地方，話強積金保障唔到家庭主婦同低收入人士，有咗強積金制度後，啲中大型企業就將百分之五嘅供款變咗做最高供款，仲話如果只停留喺五加五供款，就等於「埋首落沙堆，其實係搞唔掂」。
佢咁肉緊，因為佢喺港英年代曾經負責推銷老年退休金，但因商界同北京反對而無疾而終，佢自己最後更被調離職位。WK話最諷刺就係其實內地已經有退休保障計劃，問題喺九十年代已迫在眉睫，依家先講其實已經太遲。