政情：高錕結婚51周年紀念
攞咗諾貝爾物理學獎嘅高錕呢排同太太黃美芸喺香港過中秋，咁啱又撞正佢哋嘅結婚周年紀念，結果啱啱食完芝士蛋糕，又要食月餅慶祝。高太仲話，高教授返嚟香港過完中秋肥咗成四、五磅咁多。
高太喺電台訪問度話，今個月十九日係佢同高教授結婚五十一周年紀念，乖巧識做嘅姨甥女特登買咗個好靚嘅芝士蛋糕返屋企同佢哋兩夫婦慶祝，仲喺個蛋糕度點咗一支蠟燭，話「五十又有一」咁講。原來九月十九日仲係佢哋個女嘅生日，真係有雙重意義喇。
不過原來高教授唔係咁熱衷於慶祝節日，例如情人節都唔會特別慶祝，高太話︰「佢話日日都咁開心，咁浪漫，日日都慶祝啦，點解要揀一日嚟慶祝。」今年中秋節，高太佢哋同親戚食飯，簡簡單單咁過，之不過高教授似乎幾鍾意食月餅。高太話，高教授至愛食豆沙餡，仲一個人食咗半個月餅，搞到肥咗四、五磅。