政情：周一嶽「擔遮」死撐醫保
港府以五百億元、「十大特點」利誘市民購買自願醫療保險計劃，結果反應唔多討好，不但被病人組織批評計劃搵老襯外，連保險業界都批評計劃條文苛刻。食物及衞生局局長周一嶽過去兩日都捨棄咗個飛龍襟章，改戴淺藍色嘅雨傘襟章，好聽就話為未來公共醫療開支未雨綢繆，實際係為醫保死撐，將政府醫療開支轉嫁到市民身上。
周一嶽尋日分別出席電台節目及向十八區區議會正、副主席簡介醫保計劃，去到電台首先被主持人寸佢「落雨擔遮」，佢就死撐話係未雨綢繆，繼而被聽眾連環質詢，去到見區議會主席同樣遭受批評。多位主席認為市民購買醫保應該免稅，可惜周一嶽一口拒絕，又有主席批評保費按年齡遞增安排不合理，應倣效現時私營醫療保險嘅定額保費，否則難以吸引市民參加，睇嚟周一嶽要搞掂計劃都唔容易。
