中環耳目：甜湯「笑」女友畫功未夠班

湯、陳早前一齊出席十‧一酒會，但鏡頭前兩人依然靦覥，要搵埋朋友先肯合照。前晚伊人無同行，問湯專員做咩唔同陳小姐一齊嚟，佢話︰「陳詠梅！？佢畫中國畫，都參加過一、兩次畫展，不過佢啲畫嘅水平……（仲有進步空間？）仲有唔少進步空間。」

「性情同各方面都接近」

其實陳詠梅嘅書法同精細嘅工筆畫水平都幾高，保安局副局長黎棟國太太都係佢師妹，兩師姐妹仲曾經一齊開畫展，功力毋庸置疑。甜湯咁樣幽陳詠梅一默都唔怕佢嬲，關係不言而喻。問甜湯公開戀情後，係咪有壓力？佢又好含蓄咁話：「大家實情只係有一班識咗好多年嘅朋友，當然有啲朋友喺性情同各方面都接近啲。」唔使講，同邊個最接近，肯定係陳詠梅啦！

至於方文雄就係攝影發燒友，自言不諳畫功嘅佢，唔及兩位公子咁鍾意畫畫。佢話兩個仔細個時試過畫畫送畀佢，依家再睇都好感動。仲有半年大仔就大學畢業，方文雄話到時會用部靚相機捕捉囝囝難忘一刻。

湯顯明（中）早前同陳詠梅（右一）雙雙出席十‧一酒會。 （資料圖片）

方文雄（右）自嘲畫功不及兩個仔；左起余鵬春、林健鋒。