政情：建制派穩主導審議競爭法
社會仇商情緒蔓延，競爭法隨時變惹火議題。立法會內務委員會預計今日決定成立審議有關條例草案嘅委員會，由議員即場報名加入，為委員會日後主席之爭敲響戰鼓。公民黨議員早前揚言，要爭做委員會主席，據悉，建制派為免鷸蚌相爭，漁人得利，已達成默契，撐經濟動力梁君彥（Andrew）競逐，必要時搵齊人「冧友」入委員會，確保建制派能取下主席位置，可見兩邊陣營對呢個委員會主導權都志在必得。
立法會暑假過完，政黨角力陸續上演，競爭法涉及財團壟斷同中小企營商環境等問題，內容敏感，政治炸彈一點即爆，泛民唔會輕輕放過，經濟動力、自由黨同專業會議等一堆同工商界關係密切嘅政團，更希望主導草案審議過程，令委員會主席之爭成為復會後兩大陣營首個角力場。
人海戰術撼泛民
泛民之內，以公民黨同社民連最肉緊，擬空群而出入委員會，民主黨少則兩人，多則五人，再加其他獨立泛民人士，估計約有十三至十五人。即係話，如果建制派以人海戰術穩取主席之位，隨時要出動十六人或以上，兩邊陣營加起上嚟超過立法會六十名議員嘅一半，可算嚴陣以待。
競爭法中較具爭議性內容，係貿發局應唔應該獲豁免規管。Andrew同佢嘅「競選拉票人」林健鋒（Jeffrey）係貿發局理事，泛民一定捉住呢點嚟打，攻擊Andrew嘅商界背景存在利益衝突。不過，建制派一樣可指摘泛民唔熟商界運作，所以口水戰肯定難分高下，鬥人頭最實際。據聞，建制派為幫Andrew拿下主席之位，各政團都要「交人、交數」，派員加入委員會，點都要壓倒民主派；以建制派嘅人數優勢，Andrew嘅勝算可算十拿九穩。咁多議員爭住入委員會，以後開會都係咁熱衷就好囉。
經濟動力可望喺議會攞多一個委員會主席位置，議會之外一樣動作多多，尋日宣布十月二十一日上午十一點至晚上七點，喺會展舉辦「上車置業動力展」，搵三間地產代理公司，向置業不成嘅年輕人介紹「上車盤」資料同教授「上車」錦囊。自由黨早前爭取選委會加地產代理分組，唔通經濟動力一心要同自由黨爭地產代理票？我哋尋日問Jeffrey，佢都係答嗰句：唔回應。