政情：梁美芬何鍾泰聯手吸票

梁美芬平日同專業會議嘅何鍾泰關係唔見特別緊密，估唔到佢同工聯會「分手」，第一個出嚟撐佢，竟然就係呢位專業會議同僚。何鍾泰旗下嘅工程界促進會，尋日同西九新動力舉行聯合記者會，宣布推薦旗下十二名成員加盟新動力，新動力亦推薦部分區議員成員入促進會，宣稱要將專業同地區結合，喺高鐵、舊樓重建同西九藝術文化區等議題，為街坊提供專業意見。何鍾泰仲話，正籌備成立智庫，日後可以支持西九新動力嘅政策研究咁話。

眾所周知，西九新動力係梁美芬嘅立法會競選班底，而工程界促進會過往亦有成員參選區議會，兩檔人合作，可謂各取所需，不過，最後算盤打唔打得響，就要睇過至知。