政情：立會嘥紙王環保貪口爽

李國寶榜上有名

立法會秘書處尋日發出通告，叫班議員重新檢視對立法會文件複印本嘅需求，希望減少立法會整體嘅用紙量。原來六十位議員中，有成十幾人要求全部文件嘅複印本，好多仲要中文一份、英文一份。成日畀外界評為「懶蛇」嘅幾位立法會議員，包括金融界李國寶，演藝、體育、文化及出版界霍震霆同金融服務界詹培忠都要晒所有文件嘅複印本，榮登「嘥紙王」寶座。佢哋平時連會都唔多開，唔通佢哋平日有匿埋睇文件嘅癖好，還是用啲文件嚟摺飛機？

普通市民可能想像唔到，立法會日常真係有好多文件往來，除咗必備嘅開會議程、資料文件、會議紀錄同議案預告外，仲有官員向立法會提交嘅回覆、議員當值日誌、秘書處人事安排同法律顧問意見等，另外仲有大量行政上嘅文書往來，以前仲未電子化時，每日送去議員辦事處嘅文件，分分鐘有幾吋厚。

不過隨着時代進步，一切都已經電腦化，立法會喺好多年前已經開始用soft copy送文件畀議員，總之一切都用電郵溝通，照道理立法會應該會用少好多紙至係，但事實並唔係咁，幾乎全部議員仲係保留番要實實在在攞複印文本嘅習慣，而各黨派嘅巨頭都冇帶頭環保，好似民建聯主席譚耀宗、民主黨主席何俊仁、自由黨主席劉健儀等，有九成文件佢哋都要攞複印本。

以為專責環保事宜嘅環境事務委員會成員會有環保意識啲啦，但事實令人大失所望，過半委員都拎超過七成嘅複印文件，最慳紙嘅係前民主黨議員鄭家富，只要有提供電子版嘅文件都唔會要複印本，絕對環保。

其實拎住咁多紙張，浪費之餘，處理同保存亦都好費神，尤其立法會有唔少機密文件，漏咁啲出去都唔知點算。睇嚟遲啲環保團體可以試吓監察立法會嘅用紙情況，如果唔係多多樹都唔夠班議員嘥啦！