中環耳目：朱家昌教揀蟹三大法則
秋風起，蟹季又開始啦！賣大閘蟹超過半世紀嘅華記永昌號，尋日同埋德國孖人牌喺九龍荷里活廣場聯手搞咗個「蟹Tea茶聚」，卓妮唔見孖人牌代理昌興老闆余壽寧，但聽華記永昌號第二代傳人朱家昌教路揀蟹，收穫好大。朱老闆話，揀蟹時要謹記三大法則，咁樣隻蟹就Very Good啦！
睇紋理、試反應、嗅香味
朱老闆話，依家屬於季初，重約四両半至五両半嘅蟹最靚，下周日（十日）踏入季中，靚蟹就要揀五両半至六両。揀蟹時要眼、手、鼻並用，用眼睇吓紋理係咪清楚、幼細，然後用手彈吓隻蟹嘅眼或者扯吓蟹腳，睇吓佢係咪好生猛咁反抗；最後用鼻聞吓，如果味道清香代表佢出身於靚湖水，實係身嬌肉貴㗎啦！
尋日華記永昌號嘅上海點心師傅昌哥都親自出場，示範點樣炮製大閘蟹。原來昌哥喺幕後負責炮製點心供店面出售，每年九月中至一月就炮製蟹粉系列嘅小籠包、雲吞、菜肉包同埋水餃等。佢話食蟹時佐以花雕酒係至正嘅享受，怕寒就千祈咪食蟹心啊！