政情：最低工資會搵議員補缺

相對於勞方要求嘅卅三蚊同資方還價嘅廿四蚊，表面睇係啱啱中間落墨，但原來臨資會喺長達一年半嘅談判過程中，多次差啲反枱。大功告成後，勞聯嘅李啟明自覺公職太多太忙唔想過渡到委員會，工聯會嘅鄺志堅又因為即將離開工聯會搵真銀，所以兩個空缺都要搵人，有人提及，工聯會立法會議員黃國健（KK）有可能要落場，勞聯方面，亦係立會議員嘅李鳳英有可能兼任。

綜合各方消息，今次最低工資談判可以分為幾個階段，首先係將資方嘅廿四蚊同勞方嘅卅三蚊，收窄為廿六至三十蚊，之後談判就陷入首個僵局，三名勞方委員表明低過廿八蚊就會拉倒談判，但兩名資方委員陳裕光同麥瑞瓊則堅持低於廿八蚊。喺呢個關鍵時刻，做過香港國際仲裁中心主席、擅長仲裁同調解紛爭嘅鄭若驊，建議臨資會暫停開會一個月，等大家冷靜吓再傾過。

疑刻意施政報告後公布

臨資會小休復會後，陳裕光同麥瑞瓊繼續企硬，鄭若驊就再次出招，默許其餘七名非官方委員喺廿八至三十蚊範圍內繼續商討，變相將兩人孤立。點知此時突然有報章引述消息，話臨資會已初步同意將最低工資訂喺廿九蚊，令會內嘅資方委員非常不滿，質疑勞方委員亂向傳媒放風施壓。

直至今年八月臨資會嘅談判死線臨近，陳裕光立場開始軟化，同意廿八蚊亦勉強可以接受，但麥瑞瓊依然企得好硬。有委員提出如果真係達唔成共識，就以多數壓少數投票決定，令談判再次面臨破裂。不過鄭若驊再次發揮軟功，游說大家以和為貴繼續慢慢傾，最終搞掂埋麥瑞瓊同意廿八蚊。

幾經辛苦達成廿八蚊嘅協議，負責撰寫報告嘅公務員歎晒慢板，到依家都只係寫好英文版，中文版估計仲有個多星期先搞掂，令人質疑係想刻意押後正式交報告嘅日期，使政府毋須喺施政報告公布當局嘅最終決定，以免勞工界有藉口反對整份施政報告。