政情：坐靚位捧紅魔張文High爆
立法會議員張文光係曼聯迷，佢上月底去英國欣賞曼聯對保頓嘅賽事，坐正喺被喻為死忠「粉絲」專區嘅龍門後面第四排，身邊球迷全場又叫又跳，曼聯戰歌此起彼落，氣氛熾熱高漲，令張文從未如此high過。
發噩夢收「太陽稅」
張文屋企大裝修，暑假旅行押後至上月中始成行，佢同太太去意大利西西里島觀光十日，然後去埋英國過睇波癮。
張文去英國睇波絕非新鮮事，但係深入紅魔死忠「粉絲」專區虎穴就係人生第一次，佢坐正邊位，上半場近曼聯龍門，睇住「紅魔鬼」先輸一球再扳平，到下半場換邊，紅魔兵團又失波，正當大家肉緊到咬牙切齒之際，奧雲一個頭槌追和，張文形容，奧雲仔好似就喺佢面前將個波頂入龍門，令佢high爆！
張文旅程咁開心，但一樣發噩夢，喺假期結束返港前一晚，夢見煲呔曾喺施政報告宣布，向全港市民徵收太陽稅，張文激到拍枱大鬧，但鬧鬧吓，夢裏嘅佢又醒起曬太陽又點會收稅呢，於是喺夢中笑醒。