政情：陳南祿帶股神馬場搏殺
恒隆地產董事總經理陳南祿（Philip）做人做事幾時都咁積極，佢由國泰航空過檔恒隆後繼續發力。尋日難得係公眾假期，佢都帶咗幾位朋友入沙田馬場湊熱鬧，其中一位來頭唔小，就係被譽為「歐洲股神」嘅富達國際投資總裁Anthony Bolton。
Bolton經歷五次金融危機，擅於運用逆向投資策略，提倡與市場反其道而行，偏好較冷門股份或在股市大跌時趁低吸納。Bolton喺○七年退下火線後，擔任富達分析員及基金經理導師，今年二月重出江湖，掌管富達中國特別情況基金，今年四月喺英國上市，表現理想，早前佢更移居香港，以便接近中國市場。
祿哥話，Anthony移居香港只有幾個月，大家認識無耐，仲未知Anthony有無攞香港身份證。問祿哥有無請教Anthony嘅投資心得，佢話：「使乜啫，Anthony寫咗本『贏』（書籍）嘛，睇吓咪得囉！」祿哥口中嗰本「贏」，唔知係咪指Anthony去年出版嘅《Investing Against The Tide》（逆勢出擊），Anthony喺書中分享多年投資心得。