政情：落選港姐劉聖雪 入新民黨挑戰自己
近年選美出身嘅女性加入政壇嘅例子有增無減，好似前港姐任葆琳前年當選南區區議員，最新一個就係參加過一五年港姐，同當年冠軍十優港姐麥明詩同屆嘅劉聖雪（Dana），早前已加入新民黨做社區工作，佢自言做人要癲先敢挑戰自己，因此先會參選港姐同服務社區喎。
唔介意畀人話花瓶
Dana前年參選港姐十六強止步，之不過佢擁有亮麗學歷，曾經喺中文大學同香港大學做鼻咽癌同幹細胞研究，早前已報讀咗法律博士等待九月開學。目前於康山服務嘅Dana透露與政圈結緣，同前年區議會選舉及去年立法會選舉有關，又憶述自己去年為新民黨容海恩助選，試過畀人用粗口辱罵，所以預計日後都有畀人當面鬧嘅機會。Dana又自言，唔介意被人形容為花瓶，最緊要係做到實事。