中環耳目：龐盧淑燕孖前新抱撐枱腳
婆媳之間好易火星撞地球，啱key者，好難得。保良局副主席龐盧淑燕就同前新抱黃美儀糖黐豆，即使阿仔龐維仁同前妻已各行各路，龐太想搵伴行街，都係搵前新抱。早前一個星期五下午，卓妮撞見佢兩人響Cafe Landmark撐枱腳，表現如母女般親密。
翹實手臂shopping
一坐低，龐太柯打一份火腿芝士三文治烘底，同前新抱分甘同味；龐太注重健康，齋飲清水，美儀就叫咗杯檸茶。期間兩人無所不談，旁人唔知，仲以為佢哋係兩母女。唔經唔覺傾咗粒幾鐘，龐太提議行置地shopping，美儀一於翹實前奶奶手臂奉陪。
講起去Cafe Landmark歎茶，龐太話首推大蝦多士。烹調方法考究，秘訣係將新鮮蝦以鹽及生粉洗淨，配以日本麵包糠後落鑊用菜油炸，鬆化可口。食時點Cafe Landmark自家製他他醬，令人一試難忘，每客盛惠八十元。
