中環出更：「和統」年會全球政商捧場
去年成立嘅中國和平統一促進會香港總會，喺啱啱過去嘅中秋佳節前首次主辦全球和統會年會，來自七十幾個國家嘅一千五百幾名各分會嘅成員匯聚香江，全國政協副主席杜青林、國台辦常務副主任鄭立中等京官專程來港參與盛會，本港政商界亦現身撐場。晚宴時，卓妮見熟悉台灣工作嘅鄭立中成晚舉杯舉到手軟，人緣好好，卓妮問佢覺得咩台灣美食最好食，佢諗都唔諗就話，至愛淡水嘅阿婆鐵蛋，果然夠牙力！
鄭立中做過廈門市委書記，係對台工作嘅骨幹，兩年前海協會會長陳雲林首次訪台，就係由佢率先深入綠營大本營踩線。今次講統一大業點少得佢呢？香港總會理事長楊孫西、會長高敬德、秘書長盧文端等主人家盡東道主之誼，和統會監事長霍震寰、常務副會長蔣麗芸、王國強等人撐場，十分熱鬧。
變臉表演全場爆笑
高敬德係四川人，當晚特登安排四川國粹變臉絕活表演，全場賓客睇到入晒神，點知變臉大師突然變出政制及內地事務局局長林瑞麟嘅尊容，惹得全場爆笑，包括坐在台下嘅林瑞麟夫婦。講起與台灣淵源，楊孫西話三十幾年前就喺台灣做紡織生意，台灣人好識做生意，將中國人、西方人同日本人嘅優點集一身。佢難忘台灣人酒量好，又好客。楊孫西間武夷山香江茶葉嘅大紅袍頂級靚茶出晒名，佢年頭去過參觀當地茶藝文化，諗緊點樣同台灣同業合作，以後大家以茶代酒仲開心啦！