中環出更：甘健成睇樓唔通另起爐灶？
中環著名米芝蓮星級食府鏞記酒家月前上演「溏心風暴」，仲傳出大佬甘健成另起爐灶，唔知真定假。前晚七時許，卓妮喺灣仔皇后大道東東美中心附近遇到鏞記老闆甘健成，見佢不時講電話，又仰望對面嘅舊樓群，無耐一位朋友與他會合，兩人不斷仰望對面舊樓指手畫腳，足足睇咗五分鐘，似足地產經紀帶客睇樓咁款。莫非甘老闆睇中灣仔物業靜中帶旺？
甘老闆同朋友睇完舊樓後，就邊行邊講，沿着蘭杜街、分域街，再橫過軒尼詩道，一直行到謝斐道間Spicy Fingers酒吧餐廳，揀選咗行人路旁嘅露天座位坐低飲嘢傾偈，期間煙不離手，抽完一支無耐，又再點第二支煙，好似好多嘢諗。甘老闆咁大煙癮，可能佢自己都擔心唔夠煙，所以行去餐廳中途，特登走入便利店買咗包煙補給。
與弟關係「冇乜嘢啦」
其實甘老闆等候朋友期間，卓妮曾上前打招呼，佢話約咗朋友去食西式晚餐，仲話咁多西餐之中，最鍾意係西班牙菜及法國菜，佢話食多啲西餐，可以吸取西餐嘅長處，研究可否創出新菜式。喺啱啱過去嘅中秋節，甘健成話同屋企人開開心心食咗餐飯，但問到同胞弟甘琨禮嘅訴訟及會否修好關係時，佢只係話：「冇乜嘢啦，呢啲嘢慢慢嚟啦！」總之不欲多談。
卓妮